Padesarajjaṁ vipulaṁ, gaṇanāto asaṅkhiyaṁ; Anubhomi sakaṁ kammaṁ, pubbe sukatamattano. Dvenavute ito kappe, yaṁ kammamakariṁ tadā; Duggatiṁ nābhijānāmi, dhajadānassidaṁ phalaṁ. Icchamāno cahaṁ ajja, sakānanaṁ sapabbataṁ; Khomadussena chādeyyaṁ, tadā mayhaṁ kate phalaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā dhajadāyako thero imā gāthāyo abhāsitthāti. Dhajadāyakattherassāpadānaṁ tatiyaṁ. Ekapadumiyavagga 4 Tikiṅkaṇipūjakattheraapadāna “Himavantassāvidūre, bhūtagaṇo nāma pabbato; Tatthaddasaṁ paṁsukūlaṁ, dumaggamhi vilaggitaṁ. Tīṇi kiṅkaṇipupphāni, ocinitvānahaṁ tadā; Haṭṭho haṭṭhena cittena, paṁsukūlaṁ apūjayiṁ. Ekattiṁse ito kappe, yaṁ kammamakariṁ tadā; Duggatiṁ nābhijānāmi, tiṇṇaṁ pupphānidaṁ phalaṁ.