Tiṁsatime ito kappe, rājā āsiṁ janādhibhū; Mahāpulinanāmena, cakkavattī mahabbalo. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”. Itthaṁ sudaṁ āyasmā pulinapūjako thero imā gāthāyo abhāsitthāti. Pulinapūjakattherassāpadānaṁ sattamaṁ. Subhūtivagga 8 Uttiyattheraapadāna “Candabhāgānadītīre, susumāro ahaṁ tadā; Sagocarappasutohaṁ, nadītitthaṁ agacchahaṁ. Siddhattho tamhi samaye, sayambhū aggapuggalo; Nadiṁ taritukāmo so, nadītitthaṁ upāgami. Upāgate ca sambuddhe, ahampi tatthupāgamiṁ; Upagantvāna sambuddhaṁ, imaṁ vācaṁ udīrayiṁ. ‘Abhirūha mahāvīra, tāressāmi ahaṁ tuvaṁ; Pettikaṁ visayaṁ mayhaṁ, anukampa mahāmuni’. Mama uggajjanaṁ sutvā, abhirūhi mahāmuni; Haṭṭho haṭṭhena cittena, tāresiṁ lokanāyakaṁ.