“Padumuttarabhagavato, sujāto nāma sāvako; Paṁsukūlaṁ gavesanto, saṅkāre carate tadā. Nagare haṁsavatiyā, paresaṁ bhatako ahaṁ; Upaḍḍhadussaṁ datvāna, sirasā abhivādayiṁ. Tena kammena sukatena, cetanāpaṇidhīhi ca; Jahitvā mānusaṁ dehaṁ, tāvatiṁsamagacchahaṁ. Tettiṁsakkhattuṁ devindo, devarajjamakārayiṁ; Sattasattatikkhattuñca, cakkavattī ahosahaṁ. Padesarajjaṁ vipulaṁ, gaṇanāto asaṅkhiyaṁ; Upaḍḍhadussadānena, modāmi akutobhayo. Icchamāno cahaṁ ajja, sakānanaṁ sapabbataṁ; Khomadussehi chādeyyaṁ, aḍḍhadussassidaṁ phalaṁ. Satasahassito kappe, yaṁ dānamadadiṁ tadā; Duggatiṁ nābhijānāmi, aḍḍhadussassidaṁ phalaṁ. Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ.