Yāguṁ saṅghassa datvāna, puññakkhette anuttare; Pañcānisaṁse anubhomi, aho yāgusuyiṭṭhatā. Abyādhitā rūpavatā, khippaṁ dhammanisantitā; Lābhitā annapānassa, āyu pañcamakaṁ mama. Yo koci vedaṁ janayaṁ, saṅghe yāguṁ dadeyya so; Imāni pañca ṭhānāni, paṭigaṇheyya paṇḍito. Karaṇīyaṁ kataṁ sabbaṁ, bhavā ugghāṭitā mayā; Sabbāsavā parikkhīṇā, natthi dāni punabbhavo. So ahaṁ vicarissāmi, gāmā gāmaṁ purā puraṁ; Namassamāno sambuddhaṁ, dhammassa ca sudhammataṁ. Tiṁsakappasahassamhi, yaṁ dānamadadiṁ tadā; Duggatiṁ nābhijānāmi, yāgudānassidaṁ phalaṁ. Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā yāgudāyako thero imā gāthāyo abhāsitthāti. Yāgudāyakattherassāpadānaṁ aṭṭhamaṁ. Bhaddālivagga Patthodanadāyakattheraapadāna