Dhātiyo maṁ upaṭṭhanti, khujjā celāpikā bahū; Aṅkena aṅkaṁ gacchāmi, ekāsanassidaṁ phalaṁ. Aññā nhāpenti bhojenti, aññā ramenti maṁ sadā; Aññā gandhaṁ vilimpanti, ekāsanassidaṁ phalaṁ. Maṇḍape rukkhamūle vā, suññāgāre vasantiyā; Mama saṅkappamaññāya, pallaṅko upatiṭṭhati. Ayaṁ pacchimako mayhaṁ, carimo vattate bhavo; Ajjāpi rajjaṁ chaḍḍetvā, pabbajiṁ anagāriyaṁ. Satasahassito kappe, yaṁ dānamadadiṁ tadā; Duggatiṁ nābhijānāmi, ekāsanassidaṁ phalaṁ. Kilesā jhāpitā mayhaṁ, …pe… viharāmi anāsavā. Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ ekāsanadāyikā bhikkhunī imā gāthāyo abhāsitthāti. Ekāsanadāyikātheriyāpadānaṁ catutthaṁ. Ekūposathikavagga Pañcadīpadāyikātherīapadāna