Hemajālābhisañchannā, upaṭṭhānaṁ karonti me; Balakāye gaje ceva, ūnatā me na vijjati. Soṇṇakiṅkaṇipupphānaṁ, vipākaṁ anubhomahaṁ; Aṭṭhapaññāsakkhattuñca, devarajjamakārayiṁ. Ekasattatikkhattuñca, cakkavattī ahosahaṁ; Pathabyā rajjaṁ ekasataṁ, mahiyā kārayiṁ ahaṁ. So dāni amataṁ patto, asaṅkhataṁ sududdasaṁ; Saṁyojanaparikkhīṇo, natthi dāni punabbhavo. Aṭṭhārase kappasate, yaṁ pupphamabhiropayiṁ; Duggatiṁ nābhijānāmi, buddhapūjāyidaṁ phalaṁ. Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā sovaṇṇakiṅkaṇiyo thero imā gāthāyo abhāsitthāti. Sovaṇṇakiṅkaṇiyattherassāpadānaṁ navamaṁ. Sakiṁsammajjakavagga 10 Soṇṇakontarikattheraapadāna