Sadevagandhabbamanussarakkhase, Ābhā uḷārā vipulā ajāyatha; Imasmiṁ loke parasmiñcobhayasmiṁ, Adho ca uddhaṁ tiriyañca vitthataṁ. Sattuttamo anadhivaro vināyako, Satthā ahū devamanussapūjito; Mahānubhāvo satapuññalakkhaṇo, Dassesi accherakaṁ pāṭihīraṁ. So yācito devavarena cakkhumā, Atthaṁ samekkhitvā tadā naruttamo; Caṅkamaṁ māpayi lokanāyako, Suniṭṭhitaṁ sabbaratananimmitaṁ. Iddhī ca ādesanānusāsanī, Tipāṭihīre bhagavā vasī ahu; Caṅkamaṁ māpayi lokanāyako, Suniṭṭhitaṁ sabbaratananimmitaṁ. Dasasahassīlokadhātuyā, Sinerupabbatuttame; Thambheva dassesi paṭipāṭiyā, Caṅkame ratanāmaye.