“Dhammadassissa munino, bodhiyā pādaputtame; Pasannacitto sumano, jagatiṁ kārayiṁ ahaṁ. Darito pabbatato vā, rukkhato patito ahaṁ; Cuto patiṭṭhaṁ vindāmi, jagatiyā idaṁ phalaṁ. Na me corā vihesanti, nātimaññanti khattiyā; Sabbāmittetikkamāmi, jagatiyā idaṁ phalaṁ. Yaṁ yaṁ yonupapajjāmi, devattaṁ atha mānusaṁ; Sabbattha pūjito homi, jagatiyā idaṁ phalaṁ. Aṭṭhārase kappasate, jagatiṁ kārayiṁ ahaṁ; Duggatiṁ nābhijānāmi, jagatidānassidaṁ phalaṁ. Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo. Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”.