Sakkāyavūpakāso me, hetubhūto mamābhavī; Manaso vūpakāsassa, saṁsaggabhayadassino. Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo. Svāgataṁ vata me āsi, mama buddhassa santike; Tisso vijjā anuppattā, kataṁ buddhassa sāsanaṁ. Paṭisambhidā catasso, vimokkhāpi ca aṭṭhime; Chaḷabhiññā sacchikatā, kataṁ buddhassa sāsanaṁ”. Itthaṁ sudaṁ āyasmā ekavihāriko thero imā gāthāyo abhāsitthāti. Ekavihārikattherassāpadānaṁ paṭhamaṁ. Ekavihārivagga Ekasaṅkhiyattheraapadāna “Vipassino bhagavato, mahābodhimaho ahu; Mahājanā samāgamma, pūjenti bodhimuttamaṁ. Na hi taṁ orakaṁ maññe, buddhaseṭṭho bhavissati; Yassāyaṁ īdisā bodhi, pūjanīyā ca satthuno. Tato saṅkhaṁ gahetvāna, bodhirukkhamupaṭṭhahiṁ; Dhamanto sabbadivasaṁ, avandiṁ bodhimuttamaṁ. Āsannake kataṁ kammaṁ, devalokaṁ apāpayī; Kaḷevaraṁ me patitaṁ, devaloke ramāmahaṁ.