Itthaṁ sudaṁ āyasmā tālaphaladāyako thero imā gāthāyo abhāsitthāti. Tālaphaladāyakattherassāpadānaṁ navamaṁ. Kaṇikāravagga 10 Nāḷikeraphaladāyakattheraapadāna “Nagare bandhumatiyā, ārāmiko ahaṁ tadā; Addasaṁ virajaṁ buddhaṁ, gacchantaṁ anilañjase. Nāḷikeraphalaṁ gayha, buddhaseṭṭhassadāsahaṁ; Ākāse ṭhitako santo, paṭiggaṇhi mahāyaso. Vittisañjanano mayhaṁ, diṭṭhadhammasukhāvaho; Phalaṁ buddhassa datvāna, vippasannena cetasā. Adhigacchiṁ tadā pītiṁ, vipulañca sukhuttamaṁ; Uppajjateva ratanaṁ, nibbattassa tahiṁ tahiṁ. Ekanavutito kappe, yaṁ phalaṁ adadiṁ tadā; Duggatiṁ nābhijānāmi, phaladānassidaṁ phalaṁ. Dibbacakkhu visuddhaṁ me, samādhikusalo ahaṁ; Abhiññāpāramippatto, phaladānassidaṁ phalaṁ. Kilesā jhāpitā mayhaṁ, …pe… viharāmi anāsavo.