Koṭisatasahassānaṁ, vimalānaṁ mahesinaṁ; Saha lokagganāthena, paramannena tappayiṁ. Sopi maṁ buddho byākāsi, koṇḍañño lokanāyako; ‘Aparimeyyito kappe, buddho loke bhavissati. Padhānaṁ padahitvāna, katvā dukkarakārikaṁ; Assatthamūle sambuddho, bujjhissati mahāyaso. Imassa janikā mātā, māyā nāma bhavissati; Pitā suddhodano nāma, ayaṁ hessati gotamo. Kolito upatisso ca, aggā hessanti sāvakā; Ānando nāmupaṭṭhāko, upaṭṭhissatimaṁ jinaṁ.