Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā amodaphaliyo thero imā gāthāyo abhāsitthāti. Amodaphaliyattherassāpadānaṁ aṭṭhamaṁ. Kaṇikāravagga 9 Tālaphaladāyakattheraapadāna “Sataraṁsī nāma bhagavā, sayambhū aparājito; Vivekā vuṭṭhahitvāna, gocarāyābhinikkhami. Phalahattho ahaṁ disvā, upagacchiṁ narāsabhaṁ; Pasannacitto sumano, tālaphalaṁ adāsahaṁ. Catunnavutito kappe, yaṁ phalaṁ adadiṁ tadā; Duggatiṁ nābhijānāmi, phaladānassidaṁ phalaṁ. Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”.