Itthaṁ sudaṁ āyasmā pāṭihīrasaññako thero imā gāthāyo abhāsitthāti. Pāṭihīrasaññakattherassāpadānaṁ tatiyaṁ. Ekavihārivagga Ñāṇatthavikattheraapadāna “Kaṇikāraṁva jalitaṁ, dīparukkhaṁva jotitaṁ; Kañcanaṁva virocantaṁ, addasaṁ dvipaduttamaṁ. Kamaṇḍaluṁ ṭhapetvāna, vākacīrañca kuṇḍikaṁ; Ekaṁsaṁ ajinaṁ katvā, buddhaseṭṭhaṁ thaviṁ ahaṁ. ‘Tamandhakāraṁ vidhamaṁ, mohajālasamākulaṁ; Ñāṇālokaṁ dassetvāna, nittiṇṇosi mahāmuni. Samuddharasimaṁ lokaṁ, sabbāvantamanuttaraṁ; Ñāṇe te upamā natthi, yāvatājagatogati. Tena ñāṇena sabbaññū, iti buddho pavuccati; Vandāmi taṁ mahāvīraṁ, sabbaññutamanāvaraṁ’. Satasahassito kappe, buddhaseṭṭhaṁ thaviṁ ahaṁ; Duggatiṁ nābhijānāmi, ñāṇatthavāyidaṁ phalaṁ. Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ.