Ete aṅge adhiṭṭhāya, Vassāni soḷasaṁ vasiṁ; Adhiṭṭhānena me samo natthi, Esā me adhiṭṭhānapāramī”ti. Temiyacariyaṁ chaṭṭhaṁ. Yudhañjayavagga Saccapāramī 1 Kapirājacariya “Yadā ahaṁ kapi āsiṁ, nadīkūle darīsaye; Pīḷito susumārena, gamanaṁ na labhāmahaṁ. Yamhokāse ahaṁ ṭhatvā, orā pāraṁ patāmahaṁ; Tatthacchi sattu vadhako, kumbhīlo luddadassano. So maṁ asaṁsi ‘ehī’ti, ‘ahampemī’ti taṁ vatiṁ; Tassa matthakamakkamma, parakūle patiṭṭhahiṁ. Na tassa alikaṁ bhaṇitaṁ, yathā vācaṁ akāsahaṁ; Saccena me samo natthi, esā me saccapāramī”ti. Kapirājacariyaṁ sattamaṁ. Yudhañjayavagga Saccapāramī 2 Saccatāpasacariya “Punāparaṁ yadā homi, Tāpaso saccasavhayo; Saccena lokaṁ pālesiṁ, Samaggaṁ janamakāsahan”ti. Saccatāpasacariyaṁ aṭṭhamaṁ. Yudhañjayavagga Saccapāramī 3 Vaṭṭapotakacariya