Vallikāro pānadhido, atho pulinacaṅkamo; Gāthāyo pañcanavuti, gaṇitāyo vibhāvibhi. Paṁsukūlavagga Paṁsukūlasaññakattheraapadāna “Tisso nāmāsi bhagavā, sayambhū aggapuggalo; Paṁsukūlaṁ ṭhapetvāna, vihāraṁ pāvisī jino. Vinataṁ dhanumādāya, bhakkhatthāya cariṁ ahaṁ; Maṇḍalaggaṁ gahetvāna, kānanaṁ pāvisiṁ ahaṁ. Tatthaddasaṁ paṁsukūlaṁ, dumagge laggitaṁ tadā; Cāpaṁ tattheva nikkhippa, sire katvāna añjaliṁ. Pasannacitto sumano, vipulāya ca pītiyā; Buddhaseṭṭhaṁ saritvāna, paṁsukūlaṁ avandahaṁ. Dvenavute ito kappe, paṁsukūlamavandahaṁ; Duggatiṁ nābhijānāmi, vandanāya idaṁ phalaṁ. Kilesā jhāpitā mayhaṁ, bhavā sabbe samūhatā; Nāgova bandhanaṁ chetvā, viharāmi anāsavo.