Yassa kusalā dhammā na nirujjhittha tassa akusalā dhammā na nirujjhissantīti? Natthi. Yassa vā pana akusalā dhammā na nirujjhissanti tassa kusalā dhammā na nirujjhitthāti? Nirujjhittha. Yassa kusalā dhammā na nirujjhittha tassa abyākatā dhammā na nirujjhissantīti? Natthi. Yassa vā pana abyākatā dhammā na nirujjhissanti tassa kusalā dhammā na nirujjhitthāti? Nirujjhittha. Yassa akusalā dhammā na nirujjhittha tassa abyākatā dhammā na nirujjhissantīti? Natthi. Yassa vā pana abyākatā dhammā na nirujjhissanti tassa akusalā dhammā na nirujjhitthāti? Nirujjhittha. 9.2.2.6.5. Paccanīkaokāsa Yattha kusalā dhammā na nirujjhittha tattha akusalā dhammā na nirujjhissantīti? …pe…. 9.2.2.6.6. Paccanīkapuggalokāsa Yassa yattha kusalā dhammā na nirujjhittha tassa tattha akusalā dhammā na nirujjhissantīti? Suddhāvāsānaṁ dutiye citte vattamāne tesaṁ tattha kusalā dhammā na nirujjhittha, no ca tesaṁ tattha akusalā dhammā na nirujjhissanti. Asaññasattānaṁ tesaṁ tattha kusalā ca dhammā na nirujjhittha akusalā ca dhammā na nirujjhissanti. Yassa vā pana yattha akusalā dhammā na nirujjhissanti tassa tattha kusalā dhammā na nirujjhitthāti? Aggamaggasamaṅgīnaṁ arahantānaṁ yassa cittassa anantarā aggamaggaṁ paṭilabhissanti tesaṁ tattha akusalā dhammā na nirujjhissanti, no ca tesaṁ tattha kusalā dhammā na nirujjhittha. Asaññasattānaṁ tesaṁ tattha akusalā ca dhammā na nirujjhissanti kusalā ca dhammā na nirujjhittha.