Yassa ghānindriyaṁ uppajjati tassa somanassindriyaṁ …pe… upekkhindriyaṁ uppajjitthāti? Āmantā. Yassa vā pana upekkhindriyaṁ uppajjittha tassa ghānindriyaṁ uppajjatīti? Sabbesaṁ cavantānaṁ aghānakānaṁ upapajjantānaṁ tesaṁ upekkhindriyaṁ uppajjittha, no ca tesaṁ ghānindriyaṁ uppajjati. Saghānakānaṁ upapajjantānaṁ tesaṁ upekkhindriyañca uppajjittha ghānindriyañca uppajjati. Yassa ghānindriyaṁ uppajjati tassa saddhindriyaṁ …pe… paññindriyaṁ …pe… manindriyaṁ uppajjitthāti? Āmantā. Yassa vā pana manindriyaṁ uppajjittha tassa ghānindriyaṁ uppajjatīti? Sabbesaṁ cavantānaṁ aghānakānaṁ upapajjantānaṁ tesaṁ manindriyaṁ uppajjittha, no ca tesaṁ ghānindriyaṁ uppajjati. Saghānakānaṁ upapajjantānaṁ tesaṁ manindriyañca uppajjittha ghānindriyañca uppajjati. (Ghānindriyamūlakaṁ.) Yassa itthindriyaṁ uppajjati tassa purisindriyaṁ uppajjitthāti? Āmantā. Yassa vā pana purisindriyaṁ uppajjittha tassa itthindriyaṁ uppajjatīti? Sabbesaṁ cavantānaṁ na itthīnaṁ upapajjantānaṁ tesaṁ purisindriyaṁ uppajjittha, no ca tesaṁ itthindriyaṁ uppajjati. Itthīnaṁ upapajjantīnaṁ tāsaṁ purisindriyañca uppajjittha itthindriyañca uppajjati. Yassa itthindriyaṁ uppajjati tassa jīvitindriyaṁ uppajjitthāti? Āmantā.