Yassa yattha purisindriyaṁ uppajjati tassa tattha manindriyaṁ uppajjatīti? Āmantā. Yassa vā pana yattha manindriyaṁ uppajjati tassa tattha purisindriyaṁ uppajjatīti? Sacittakānaṁ na purisānaṁ upapajjantānaṁ tesaṁ tattha manindriyaṁ uppajjati, no ca tesaṁ tattha purisindriyaṁ uppajjati. Purisānaṁ upapajjantānaṁ tesaṁ tattha manindriyañca uppajjati purisindriyañca uppajjati. (Purisindriyamūlakaṁ.) Yassa yattha jīvitindriyaṁ uppajjati tassa tattha somanassindriyaṁ uppajjatīti? Vinā somanassena upapajjantānaṁ pavatte somanassavippayuttacittassa uppādakkhaṇe tesaṁ tattha jīvitindriyaṁ uppajjati, no ca tesaṁ tattha somanassindriyaṁ uppajjati. Somanassena upapajjantānaṁ pavatte somanassasampayuttacittassa uppādakkhaṇe tesaṁ tattha jīvitindriyañca uppajjati somanassindriyañca uppajjati. Yassa vā pana yattha somanassindriyaṁ uppajjati tassa tattha jīvitindriyaṁ uppajjatīti? Āmantā. Yassa yattha jīvitindriyaṁ uppajjati tassa tattha upekkhindriyaṁ uppajjatīti? Vinā upekkhāya upapajjantānaṁ pavatte upekkhāvippayuttacittassa uppādakkhaṇe tesaṁ tattha jīvitindriyaṁ uppajjati, no ca tesaṁ tattha upekkhindriyaṁ uppajjati. Upekkhāya upapajjantānaṁ pavatte upekkhāsampayuttacittassa uppādakkhaṇe tesaṁ tattha jīvitindriyañca uppajjati upekkhindriyañca uppajjati.