Vinā upekkhāya sahetukānaṁ upapajjantānaṁ pavatte upekkhāvippayuttasaddhāsampayuttacittassa uppādakkhaṇe tesaṁ tattha upekkhindriyaṁ na uppajjati, no ca tesaṁ tattha saddhindriyaṁ na uppajjati. Sabbesaṁ cittassa bhaṅgakkhaṇe upekkhāvippayuttasaddhāvippayuttacittassa uppādakkhaṇe asaññasattānaṁ tesaṁ tattha upekkhindriyañca na uppajjati saddhindriyañca na uppajjati. Yassa vā pana yattha saddhindriyaṁ na uppajjati tassa tattha upekkhindriyaṁ na uppajjatīti? Ahetukānaṁ upekkhāya upapajjantānaṁ pavatte saddhāvippayuttaupekkhāsampayuttacittassa uppādakkhaṇe tesaṁ tattha saddhindriyaṁ na uppajjati, no ca tesaṁ tattha upekkhindriyaṁ na uppajjati. Sabbesaṁ cittassa bhaṅgakkhaṇe saddhāvippayuttaupekkhāvippayuttacittassa uppādakkhaṇe asaññasattānaṁ tesaṁ tattha saddhindriyañca na uppajjati upekkhindriyañca na uppajjati. Yassa yattha upekkhindriyaṁ na uppajjati tassa tattha paññindriyaṁ na uppajjatīti? Vinā upekkhāya ñāṇasampayuttānaṁ upapajjantānaṁ pavatte upekkhāvippayuttañāṇasampayuttacittassa uppādakkhaṇe tesaṁ tattha upekkhindriyaṁ na uppajjati, no ca tesaṁ tattha paññindriyaṁ na uppajjati. Sabbesaṁ cittassa bhaṅgakkhaṇe upekkhāvippayuttañāṇavippayuttacittassa uppādakkhaṇe asaññasattānaṁ tesaṁ tattha upekkhindriyañca na uppajjati paññindriyañca na uppajjati. Yassa vā pana yattha paññindriyaṁ na uppajjati tassa tattha upekkhindriyaṁ na uppajjatīti?