Sabbesaṁ cavantānaṁ pavatte kusalavippayuttacittassa bhaṅgakkhaṇe tesaṁ tattha abyākatā dhammā nirujjhanti, no ca tesaṁ tattha kusalā dhammā nirujjhanti. Pañcavokāre kusalānaṁ bhaṅgakkhaṇe tesaṁ tattha abyākatā ca dhammā nirujjhanti kusalā ca dhammā nirujjhanti. Yassa yattha akusalā dhammā nirujjhanti tassa tattha abyākatā dhammā nirujjhantīti? Arūpe akusalānaṁ bhaṅgakkhaṇe tesaṁ tattha akusalā dhammā nirujjhanti, no ca tesaṁ tattha abyākatā dhammā nirujjhanti. Pañcavokāre akusalānaṁ bhaṅgakkhaṇe tesaṁ tattha akusalā ca dhammā nirujjhanti abyākatā ca dhammā nirujjhanti. Yassa vā pana yattha abyākatā dhammā nirujjhanti tassa tattha akusalā dhammā nirujjhantīti? Sabbesaṁ cavantānaṁ pavatte akusalavippayuttacittassa bhaṅgakkhaṇe tesaṁ tattha abyākatā dhammā nirujjhanti, no ca tesaṁ tattha akusalā dhammā nirujjhanti. Pañcavokāre akusalānaṁ bhaṅgakkhaṇe tesaṁ tattha abyākatā ca dhammā nirujjhanti akusalā ca dhammā nirujjhanti. 9.2.2.1.4. Paccanīkapuggala Yassa kusalā dhammā na nirujjhanti tassa akusalā dhammā na nirujjhantīti? Akusalānaṁ bhaṅgakkhaṇe tesaṁ kusalā dhammā na nirujjhanti, no ca tesaṁ akusalā dhammā na nirujjhanti. Sabbesaṁ cittassa uppādakkhaṇe kusalavippayuttaakusalavippayuttacittassa bhaṅgakkhaṇe nirodhasamāpannānaṁ asaññasattānaṁ tesaṁ kusalā ca dhammā na nirujjhanti akusalā ca dhammā na nirujjhanti. Yassa vā pana akusalā dhammā na nirujjhanti tassa kusalā dhammā na nirujjhantīti?