Ñāṇavippayuttānaṁ upapajjantānaṁ pavatte ñāṇavippayuttacittassa uppādakkhaṇe tesaṁ jīvitindriyaṁ uppajjati, no ca tesaṁ paññindriyaṁ uppajjati. Ñāṇasampayuttānaṁ upapajjantānaṁ pavatte ñāṇasampayuttacittassa uppādakkhaṇe tesaṁ jīvitindriyañca uppajjati paññindriyañca uppajjati. Yassa vā pana paññindriyaṁ uppajjati tassa jīvitindriyaṁ uppajjatīti? Āmantā. Yassa jīvitindriyaṁ uppajjati tassa manindriyaṁ uppajjatīti? Acittakānaṁ upapajjantānaṁ tesaṁ jīvitindriyaṁ uppajjati, no ca tesaṁ manindriyaṁ uppajjati. Sacittakānaṁ upapajjantānaṁ pavatte cittassa uppādakkhaṇe tesaṁ jīvitindriyañca uppajjati manindriyañca uppajjati. Yassa vā pana manindriyaṁ uppajjati tassa jīvitindriyaṁ uppajjatīti? Āmantā. (Jīvitindriyamūlakaṁ.) Yassa somanassindriyaṁ uppajjati tassa upekkhindriyaṁ uppajjatīti? No. Yassa vā pana upekkhindriyaṁ uppajjati tassa somanassindriyaṁ uppajjatīti? No. Yassa somanassindriyaṁ uppajjati tassa saddhindriyaṁ uppajjatīti?