Sacittakānaṁ vinā somanassena upapajjantānaṁ pavatte somanassavippayuttacittassa uppādakkhaṇe tesaṁ tattha manindriyaṁ uppajjati, no ca tesaṁ tattha somanassindriyaṁ uppajjati. Somanassena upapajjantānaṁ pavatte somanassasampayuttacittassa uppādakkhaṇe tesaṁ tattha manindriyañca uppajjati somanassindriyañca uppajjati. (Somanassindriyamūlakaṁ.) Yassa yattha upekkhindriyaṁ uppajjati tassa tattha saddhindriyaṁ uppajjatīti? Upekkhāya ahetukānaṁ upapajjantānaṁ pavatte upekkhāsampayuttasaddhāvippayuttacittassa uppādakkhaṇe tesaṁ tattha upekkhindriyaṁ uppajjati, no ca tesaṁ tattha saddhindriyaṁ uppajjati. Upekkhāya sahetukānaṁ upapajjantānaṁ pavatte upekkhāsampayuttasaddhāsampayuttacittassa uppādakkhaṇe tesaṁ tattha upekkhindriyañca uppajjati saddhindriyañca uppajjati. Yassa vā pana yattha saddhindriyaṁ uppajjati tassa tattha upekkhindriyaṁ uppajjatīti? Sahetukānaṁ vinā upekkhāya upapajjantānaṁ pavatte saddhāsampayuttaupekkhāvippayuttacittassa uppādakkhaṇe tesaṁ tattha saddhindriyaṁ uppajjati, no ca tesaṁ tattha upekkhindriyaṁ uppajjati. Sahetukānaṁ upekkhāya upapajjantānaṁ pavatte saddhāsampayuttaupekkhāsampayuttacittassa uppādakkhaṇe tesaṁ tattha saddhindriyañca uppajjati upekkhindriyañca uppajjati. Yassa yattha upekkhindriyaṁ uppajjati tassa tattha paññindriyaṁ uppajjatīti?