Ye rūpāvacaraṁ arūpāvacaraṁ upapajjitvā parinibbāyissanti ye ca purisā eteneva bhāvena katici bhave dassetvā parinibbāyissanti tesaṁ itthindriyaṁ na uppajjissati, no ca tesaṁ jīvitindriyaṁ na uppajjissati. Pacchimabhavikānaṁ tesaṁ itthindriyañca na uppajjissati jīvitindriyañca na uppajjissati. Yassa vā pana jīvitindriyaṁ na uppajjissati tassa itthindriyaṁ na uppajjissatīti? Āmantā. Yassa itthindriyaṁ na uppajjissati tassa somanassindriyaṁ na uppajjissatīti? Ye rūpāvacaraṁ upapajjitvā parinibbāyissanti ye ca purisā eteneva bhāvena katici bhave dassetvā somanassena upapajjitvā parinibbāyissanti tesaṁ itthindriyaṁ na uppajjissati, no ca tesaṁ somanassindriyaṁ na uppajjissati. Pacchimabhavikānaṁ ye ca arūpaṁ upapajjitvā parinibbāyissanti ye ca purisā eteneva bhāvena katici bhave dassetvā upekkhāya upapajjitvā parinibbāyissanti tesaṁ itthindriyañca na uppajjissati somanassindriyañca na uppajjissati. Yassa vā pana somanassindriyaṁ na uppajjissati tassa itthindriyaṁ na uppajjissatīti? Yā itthiyo eteneva bhāvena katici bhave dassetvā upekkhāya upapajjitvā parinibbāyissanti tāsaṁ somanassindriyaṁ na uppajjissati, no ca tāsaṁ itthindriyaṁ na uppajjissati. Pacchimabhavikānaṁ ye ca arūpaṁ upapajjitvā parinibbāyissanti ye ca purisā eteneva bhāvena katici bhave dassetvā upekkhāya upapajjitvā parinibbāyissanti tesaṁ somanassindriyañca na uppajjissati itthindriyañca na uppajjissati. Yassa itthindriyaṁ na uppajjissati tassa upekkhindriyaṁ na uppajjissatīti?