Cittassa uppādakkhaṇe tesaṁ cittaṁ na nirujjhati, no ca tesaṁ cittaṁ na uppannaṁ. Nirodhasamāpannānaṁ asaññasattānaṁ tesaṁ cittaṁ na ceva nirujjhati na ca uppannaṁ. Yassa vā pana cittaṁ na uppannaṁ tassa cittaṁ na nirujjhatīti? Āmantā. 8.2.1.1.4. Uppādavāra Yassa cittaṁ uppajjati tassa cittaṁ uppajjitthāti? Āmantā. Yassa vā pana cittaṁ uppajjittha tassa cittaṁ uppajjatīti? Cittassa bhaṅgakkhaṇe nirodhasamāpannānaṁ asaññasattānaṁ tesaṁ cittaṁ uppajjittha, no ca tesaṁ cittaṁ uppajjati. Cittassa uppādakkhaṇe tesaṁ cittaṁ uppajjittha ceva uppajjati ca. Yassa cittaṁ na uppajjati tassa cittaṁ na uppajjitthāti? Uppajjittha. Yassa vā pana cittaṁ na uppajjittha tassa cittaṁ na uppajjatīti? Natthi. Yassa cittaṁ uppajjati tassa cittaṁ uppajjissatīti? Pacchimacittassa uppādakkhaṇe tesaṁ cittaṁ uppajjati, no ca tesaṁ cittaṁ uppajjissati. Itaresaṁ cittassa uppādakkhaṇe tesaṁ cittaṁ uppajjati ceva uppajjissati ca. Yassa vā pana cittaṁ uppajjissati tassa cittaṁ uppajjatīti? Cittassa bhaṅgakkhaṇe nirodhasamāpannānaṁ asaññasattānaṁ tesaṁ cittaṁ uppajjissati, no ca tesaṁ cittaṁ uppajjati. Cittassa uppādakkhaṇe tesaṁ cittaṁ uppajjissati ceva uppajjati ca. Yassa cittaṁ na uppajjati tassa cittaṁ na uppajjissatīti? Cittassa bhaṅgakkhaṇe nirodhasamāpannānaṁ asaññasattānaṁ tesaṁ cittaṁ na uppajjati, no ca tesaṁ cittaṁ na uppajjissati. Pacchimacittassa bhaṅgakkhaṇe tesaṁ cittaṁ na ceva uppajjati na ca uppajjissati.