Yassa vā pana manindriyaṁ uppajjittha tassa purisindriyaṁ uppajjatīti? Sabbesaṁ cavantānaṁ na purisānaṁ upapajjantānaṁ tesaṁ manindriyaṁ uppajjittha, no ca tesaṁ purisindriyaṁ uppajjati. Purisānaṁ upapajjantānaṁ tesaṁ manindriyañca uppajjittha purisindriyañca uppajjati. (Purisindriyamūlakaṁ.) Yassa jīvitindriyaṁ uppajjati tassa somanassindriyaṁ uppajjitthāti? Āmantā. Yassa vā pana somanassindriyaṁ uppajjittha tassa jīvitindriyaṁ uppajjatīti? Sabbesaṁ cavantānaṁ pavatte cittassa bhaṅgakkhaṇe tesaṁ somanassindriyaṁ uppajjittha, no ca tesaṁ jīvitindriyaṁ uppajjati. Sabbesaṁ upapajjantānaṁ pavatte cittassa uppādakkhaṇe tesaṁ somanassindriyañca uppajjittha jīvitindriyañca uppajjati. Yassa jīvitindriyaṁ uppajjati tassa upekkhindriyaṁ …pe… saddhindriyaṁ …pe… paññindriyaṁ …pe… manindriyaṁ uppajjitthāti? Āmantā. Yassa vā pana manindriyaṁ uppajjittha tassa jīvitindriyaṁ uppajjatīti? Sabbesaṁ cavantānaṁ pavatte cittassa bhaṅgakkhaṇe tesaṁ manindriyaṁ uppajjittha, no ca tesaṁ jīvitindriyaṁ uppajjati. Sabbesaṁ upapajjantānaṁ pavatte cittassa uppādakkhaṇe tesaṁ manindriyañca uppajjittha jīvitindriyañca uppajjati. (Jīvitindriyamūlakaṁ.) Yassa somanassindriyaṁ uppajjati tassa upekkhindriyaṁ uppajjitthāti? Āmantā.