Yassa vā pana manindriyaṁ na uppajjissati tassa paññindriyaṁ na uppajjitthāti? Uppajjittha. 10.2.1.6.5. Paccanīkaokāsa Yattha cakkhundriyaṁ na uppajjittha tattha sotindriyaṁ na uppajjissatīti? …pe…. 10.2.1.6.6. Paccanīkapuggalokāsa Yassa yattha cakkhundriyaṁ na uppajjittha tassa tattha sotindriyaṁ na uppajjissatīti? Āmantā. Yassa vā pana yattha sotindriyaṁ na uppajjissati tassa tattha cakkhundriyaṁ na uppajjitthāti? Pañcavokāre pacchimabhavikānaṁ tesaṁ tattha sotindriyaṁ na uppajjissati, no ca tesaṁ tattha cakkhundriyaṁ na uppajjittha. Suddhāvāsānaṁ asaññasattānaṁ arūpānaṁ tesaṁ tattha sotindriyañca na uppajjissati cakkhundriyañca na uppajjittha. Yassa yattha cakkhundriyaṁ na uppajjittha tassa tattha ghānindriyaṁ na uppajjissatīti? Āmantā. Yassa vā pana yattha ghānindriyaṁ na uppajjissati tassa tattha cakkhundriyaṁ na uppajjitthāti? Kāmāvacare pacchimabhavikānaṁ rūpāvacarānaṁ tesaṁ tattha ghānindriyaṁ na uppajjissati, no ca tesaṁ tattha cakkhundriyaṁ na uppajjittha. Suddhāvāsānaṁ asaññasattānaṁ arūpānaṁ tesaṁ tattha ghānindriyañca na uppajjissati cakkhundriyañca na uppajjittha. Yassa yattha cakkhundriyaṁ na uppajjittha tassa tattha itthindriyaṁ na uppajjissatīti? Āmantā. Yassa vā pana yattha itthindriyaṁ na uppajjissati tassa tattha cakkhundriyaṁ na uppajjitthāti?