Yassa jīvitindriyaṁ na uppajjati tassa manindriyaṁ na uppajjatīti? Āmantā. Yassa vā pana manindriyaṁ na uppajjati tassa jīvitindriyaṁ na uppajjatīti? Acittakānaṁ upapajjantānaṁ tesaṁ manindriyaṁ na uppajjati, no ca tesaṁ jīvitindriyaṁ na uppajjati. Sabbesaṁ cavantānaṁ pavatte cittassa bhaṅgakkhaṇe tesaṁ manindriyañca na uppajjati jīvitindriyañca na uppajjati. (Jīvitindriyamūlakaṁ.) Yassa somanassindriyaṁ na uppajjati tassa upekkhindriyaṁ na uppajjatīti? Upekkhāya upapajjantānaṁ pavatte upekkhāsampayuttacittassa uppādakkhaṇe tesaṁ somanassindriyaṁ na uppajjati, no ca tesaṁ upekkhindriyaṁ na uppajjati. Sabbesaṁ cittassa bhaṅgakkhaṇe somanassavippayuttaupekkhāvippayuttacittassa uppādakkhaṇe nirodhasamāpannānaṁ asaññasattānaṁ tesaṁ somanassindriyañca na uppajjati upekkhindriyañca na uppajjati. Yassa vā pana upekkhindriyaṁ na uppajjati tassa somanassindriyaṁ na uppajjatīti? Somanassena upapajjantānaṁ pavatte somanassasampayuttacittassa uppādakkhaṇe tesaṁ upekkhindriyaṁ na uppajjati, no ca tesaṁ somanassindriyaṁ na uppajjati. Sabbesaṁ cittassa bhaṅgakkhaṇe upekkhāvippayuttasomanassavippayuttacittassa uppādakkhaṇe nirodhasamāpannānaṁ asaññasattānaṁ tesaṁ upekkhindriyañca na uppajjati somanassindriyañca na uppajjati.