Yassa yattha kusalā dhammā uppajjanti tassa tattha akusalā dhammā uppajjantīti? No. Yassa vā pana yattha akusalā dhammā uppajjanti tassa tattha kusalā dhammā uppajjantīti? No. Yassa yattha kusalā dhammā uppajjanti tassa tattha abyākatā dhammā uppajjantīti? Arūpe kusalānaṁ uppādakkhaṇe tesaṁ tattha kusalā dhammā uppajjanti, no ca tesaṁ tattha abyākatā dhammā uppajjanti. Pañcavokāre kusalānaṁ uppādakkhaṇe tesaṁ tattha kusalā ca dhammā uppajjanti abyākatā ca dhammā uppajjanti. Yassa vā pana yattha abyākatā dhammā uppajjanti tassa tattha kusalā dhammā uppajjantīti? Sabbesaṁ upapajjantānaṁ pavatte kusalavippayuttacittassa uppādakkhaṇe tesaṁ tattha abyākatā dhammā uppajjanti, no ca tesaṁ tattha kusalā dhammā uppajjanti. Pañcavokāre kusalānaṁ uppādakkhaṇe tesaṁ tattha abyākatā ca dhammā uppajjanti kusalā ca dhammā uppajjanti. Yassa yattha akusalā dhammā uppajjanti tassa tattha abyākatā dhammā uppajjantīti? Arūpe akusalānaṁ uppādakkhaṇe tesaṁ tattha akusalā dhammā uppajjanti, no ca tesaṁ tattha abyākatā dhammā uppajjanti. Pañcavokāre akusalānaṁ uppādakkhaṇe tesaṁ tattha akusalā ca dhammā uppajjanti abyākatā ca dhammā uppajjanti. Yassa vā pana yattha abyākatā dhammā uppajjanti tassa tattha akusalā dhammā uppajjantīti?