Yassa ghānindriyaṁ uppajjati tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimabhavikānaṁ kāmāvacaraṁ upapajjantānaṁ tesaṁ ghānindriyaṁ uppajjati, no ca tesaṁ manindriyaṁ uppajjissati. Itaresaṁ saghānakānaṁ upapajjantānaṁ tesaṁ ghānindriyañca uppajjati manindriyañca uppajjissati. Yassa vā pana manindriyaṁ uppajjissati tassa ghānindriyaṁ uppajjatīti? Sabbesaṁ cavantānaṁ aghānakānaṁ upapajjantānaṁ tesaṁ manindriyaṁ uppajjissati, no ca tesaṁ ghānindriyaṁ uppajjati. Saghānakānaṁ upapajjantānaṁ tesaṁ manindriyañca uppajjissati ghānindriyañca uppajjati. (Ghānindriyamūlakaṁ.) Yassa itthindriyaṁ uppajjati tassa purisindriyaṁ uppajjissatīti? Pacchimabhavikānaṁ itthīnaṁ upapajjantīnaṁ yā ca itthiyo rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā parinibbāyissanti tāsaṁ upapajjantīnaṁ tāsaṁ itthindriyaṁ uppajjati, no ca tāsaṁ purisindriyaṁ uppajjissati. Itarāsaṁ itthīnaṁ upapajjantīnaṁ tāsaṁ itthindriyañca uppajjati purisindriyañca uppajjissati.