Yassa somanassindriyaṁ uppajjati tassa manindriyaṁ uppajjatīti? Āmantā. Yassa vā pana manindriyaṁ uppajjati tassa somanassindriyaṁ uppajjatīti? Sacittakānaṁ vinā somanassena upapajjantānaṁ pavatte somanassavippayuttacittassa uppādakkhaṇe tesaṁ manindriyaṁ uppajjati, no ca tesaṁ somanassindriyaṁ uppajjati. Somanassena upapajjantānaṁ pavatte somanassasampayuttacittassa uppādakkhaṇe tesaṁ manindriyañca uppajjati somanassindriyañca uppajjati. (Somanassindriyamūlakaṁ.) Yassa upekkhindriyaṁ uppajjati tassa saddhindriyaṁ uppajjatīti? Upekkhāya ahetukānaṁ upapajjantānaṁ pavatte upekkhāsampayuttasaddhāvippayuttacittassa uppādakkhaṇe tesaṁ upekkhindriyaṁ uppajjati, no ca tesaṁ saddhindriyaṁ uppajjati. Upekkhāya sahetukānaṁ upapajjantānaṁ pavatte upekkhāsampayuttasaddhāsampayuttacittassa uppādakkhaṇe tesaṁ upekkhindriyañca uppajjati saddhindriyañca uppajjati. Yassa vā pana saddhindriyaṁ uppajjati tassa upekkhindriyaṁ uppajjatīti? Sahetukānaṁ vinā upekkhāya upapajjantānaṁ pavatte saddhāsampayuttaupekkhāvippayuttacittassa uppādakkhaṇe tesaṁ saddhindriyaṁ uppajjati, no ca tesaṁ upekkhindriyaṁ uppajjati. Sahetukānaṁ upekkhāya upapajjantānaṁ pavatte saddhāsampayuttaupekkhāsampayuttacittassa uppādakkhaṇe tesaṁ saddhindriyañca uppajjati upekkhindriyañca uppajjati.