Rūpāvacare arūpāvacare tattha ghānindriyaṁ na uppajjati, no ca tattha manindriyaṁ na uppajjati. Asaññasatte tattha ghānindriyañca na uppajjati manindriyañca na uppajjati. Yattha vā pana manindriyaṁ na uppajjati tattha ghānindriyaṁ na uppajjatīti? Āmantā. (Ghānindriyamūlakaṁ.) Yattha itthindriyaṁ na uppajjati tattha purisindriyaṁ na uppajjatīti? Āmantā. Yattha vā pana purisindriyaṁ na uppajjati tattha itthindriyaṁ na uppajjatīti? Āmantā …pe…. Yattha purisindriyaṁ na uppajjati tattha jīvitindriyaṁ na uppajjatīti? Uppajjati. Yattha vā pana jīvitindriyaṁ na uppajjati tattha purisindriyaṁ na uppajjatīti? Natthi. Yattha purisindriyaṁ na uppajjati tattha somanassindriyaṁ na uppajjatīti? Rūpāvacare tattha purisindriyaṁ na uppajjati, no ca tattha somanassindriyaṁ na uppajjati. Asaññasatte arūpe tattha purisindriyañca na uppajjati somanassindriyañca na uppajjati. Yattha vā pana somanassindriyaṁ na uppajjati tattha purisindriyaṁ na uppajjatīti? Āmantā. Yattha purisindriyaṁ na uppajjati tattha upekkhindriyaṁ na uppajjatīti? Rūpāvacare arūpāvacare tattha purisindriyaṁ na uppajjati, no ca tattha upekkhindriyaṁ na uppajjati. Asaññasatte tattha purisindriyañca na uppajjati upekkhindriyañca na uppajjati.