Pacchimabhavikānaṁ kāmāvacaraṁ upapajjantānaṁ ye ca saghānakā upekkhāya upapajjitvā parinibbāyissanti tesaṁ upapajjantānaṁ tesaṁ tattha ghānindriyaṁ uppajjati, no ca tesaṁ tattha somanassindriyaṁ uppajjissati. Itaresaṁ saghānakānaṁ upapajjantānaṁ tesaṁ tattha ghānindriyañca uppajjati somanassindriyañca uppajjissati. Yassa vā pana yattha somanassindriyaṁ uppajjissati tassa tattha ghānindriyaṁ uppajjatīti? Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ tesaṁ tattha somanassindriyaṁ uppajjissati, no ca tesaṁ tattha ghānindriyaṁ uppajjati. Saghānakānaṁ upapajjantānaṁ tesaṁ tattha somanassindriyañca uppajjissati ghānindriyañca uppajjati. Yassa yattha ghānindriyaṁ uppajjati tassa tattha upekkhindriyaṁ uppajjissatīti? Pacchimabhavikānaṁ kāmāvacaraṁ upapajjantānaṁ ye ca saghānakā somanassena upapajjitvā parinibbāyissanti tesaṁ upapajjantānaṁ tesaṁ tattha ghānindriyaṁ uppajjati, no ca tesaṁ tattha upekkhindriyaṁ uppajjissati. Itaresaṁ saghānakānaṁ upapajjantānaṁ tesaṁ tattha ghānindriyañca uppajjati upekkhindriyañca uppajjissati. Yassa vā pana yattha upekkhindriyaṁ uppajjissati tassa tattha ghānindriyaṁ uppajjatīti? Kāmāvacarā cavantānaṁ aghānakānaṁ kāmāvacaraṁ upapajjantānaṁ rūpāvacarānaṁ arūpāvacarānaṁ tesaṁ tattha upekkhindriyaṁ uppajjissati, no ca tesaṁ tattha ghānindriyaṁ uppajjati. Saghānakānaṁ upapajjantānaṁ tesaṁ tattha upekkhindriyañca uppajjissati ghānindriyañca uppajjati.