Yā itthiyo eteneva bhāvena katici bhave dassetvā somanassena upapajjitvā parinibbāyissanti tāsaṁ tattha upekkhindriyaṁ na uppajjissati, no ca tāsaṁ tattha itthindriyaṁ na uppajjissati. Pacchimabhavikānaṁ asaññasattānaṁ ye ca purisā eteneva bhāvena katici bhave dassetvā somanassena upapajjitvā parinibbāyissanti tesaṁ tattha upekkhindriyañca na uppajjissati itthindriyañca na uppajjissati. Yassa yattha itthindriyaṁ na uppajjissati tassa tattha saddhindriyaṁ …pe… paññindriyaṁ …pe… manindriyaṁ na uppajjissatīti? Rūpāvacarānaṁ arūpāvacarānaṁ ye ca purisā eteneva bhāvena katici bhave dassetvā parinibbāyissanti tesaṁ tattha itthindriyaṁ na uppajjissati, no ca tesaṁ tattha manindriyaṁ na uppajjissati. Pacchimabhavikānaṁ asaññasattānaṁ tesaṁ tattha itthindriyañca na uppajjissati manindriyañca na uppajjissati. Yassa vā pana yattha manindriyaṁ na uppajjissati tassa tattha itthindriyaṁ na uppajjissatīti? Āmantā. (Itthindriyamūlakaṁ.) Yassa yattha purisindriyaṁ na uppajjissati tassa tattha jīvitindriyaṁ na uppajjissatīti? Rūpāvacarānaṁ arūpāvacarānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha purisindriyaṁ na uppajjissati, no ca tesaṁ tattha jīvitindriyaṁ na uppajjissati. Pacchimabhavikānaṁ tesaṁ tattha purisindriyañca na uppajjissati jīvitindriyañca na uppajjissati.