Indriyā cakkhundriyanti? Cakkhundriyaṁ indriyañceva cakkhundriyañca. Avasesā indriyā na cakkhundriyaṁ …pe…. Aññātāvī indriyanti? Āmantā. Indriyā aññindriyanti? Aññindriyaṁ indriyañceva aññindriyañca. Avasesā indriyā na aññindriyaṁ. 10.1.2.4.2. Paccanīka Na cakkhu na indriyanti? Cakkhuṁ ṭhapetvā avasesā indriyā na cakkhu, indriyā. Cakkhuñca indriye ca ṭhapetvā avasesā na ceva cakkhu na ca indriyā. Na indriyā na sotindriyanti? Āmantā …pe…. Na cakkhu na indriyanti? Cakkhuṁ ṭhapetvā avasesā indriyā na cakkhu, indriyā. Cakkhuñca indriye ca ṭhapetvā avasesā na ceva cakkhu na ca indriyā. Na indriyā na aññātāvindriyanti? Āmantā. Na sotaṁ na indriyanti? Sotaṁ ṭhapetvā avasesā indriyā na sotaṁ, indriyā. Sotañca indriye ca ṭhapetvā avasesā na ceva sotaṁ na ca indriyā. Na indriyā na cakkhundriyanti? Āmantā …pe…. Na sotaṁ na indriyanti? Sotaṁ ṭhapetvā avasesā indriyā na sotaṁ, indriyā. Sotañca indriye ca ṭhapetvā avasesā na ceva sotaṁ na ca indriyā. Na indriyā na aññātāvindriyanti? Āmantā.