Ye purisā eteneva bhāvena katici bhave dassetvā upekkhāya upapajjitvā parinibbāyissanti tesaṁ somanassindriyaṁ na uppajjissati, no ca tesaṁ purisindriyaṁ na uppajjissati. Pacchimabhavikānaṁ ye ca arūpaṁ upapajjitvā parinibbāyissanti yā ca itthiyo eteneva bhāvena katici bhave dassetvā upekkhāya upapajjitvā parinibbāyissanti tesaṁ somanassindriyañca na uppajjissati purisindriyañca na uppajjissati. Yassa purisindriyaṁ na uppajjissati tassa upekkhindriyaṁ na uppajjissatīti? Ye rūpāvacaraṁ arūpāvacaraṁ upapajjitvā parinibbāyissanti yā ca itthiyo eteneva bhāvena katici bhave dassetvā upekkhāya upapajjitvā parinibbāyissanti tesaṁ purisindriyaṁ na uppajjissati, no ca tesaṁ upekkhindriyaṁ na uppajjissati. Pacchimabhavikānaṁ yā ca itthiyo eteneva bhāvena katici bhave dassetvā somanassena upapajjitvā parinibbāyissanti tesaṁ purisindriyañca na uppajjissati upekkhindriyañca na uppajjissati. Yassa vā pana upekkhindriyaṁ na uppajjissati tassa purisindriyaṁ na uppajjissatīti? Ye purisā eteneva bhāvena katici bhave dassetvā somanassena upapajjitvā parinibbāyissanti tesaṁ upekkhindriyaṁ na uppajjissati, no ca tesaṁ purisindriyaṁ na uppajjissati. Pacchimabhavikānaṁ yā ca itthiyo eteneva bhāvena katici bhave dassetvā somanassena upapajjitvā parinibbāyissanti tesaṁ upekkhindriyañca na uppajjissati purisindriyañca na uppajjissati.