Sabbesaṁ cittassa bhaṅgakkhaṇe akusalavippayuttacittassa uppādakkhaṇe asaññasattānaṁ tesaṁ tattha akusalā dhammā na uppajjanti, no ca tesaṁ tattha abyākatā dhammā na uppajjittha. Suddhāvāsaṁ upapajjantānaṁ tesaṁ tattha akusalā ca dhammā na uppajjanti abyākatā ca dhammā na uppajjittha. Yassa vā pana yattha abyākatā dhammā na uppajjittha tassa tattha akusalā dhammā na uppajjantīti? Āmantā. 9.2.1.5. Paccuppannānāgatavāra 9.2.1.5.1. Anulomapuggala Yassa kusalā dhammā uppajjanti tassa akusalā dhammā uppajjissantīti? Aggamaggassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe tesaṁ kusalā dhammā uppajjanti, no ca tesaṁ akusalā dhammā uppajjissanti. Itaresaṁ kusalānaṁ uppādakkhaṇe tesaṁ kusalā ca dhammā uppajjanti akusalā ca dhammā uppajjissanti. Yassa vā pana akusalā dhammā uppajjissanti tassa kusalā dhammā uppajjantīti? Sabbesaṁ cittassa bhaṅgakkhaṇe kusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ akusalā dhammā uppajjissanti, no ca tesaṁ kusalā dhammā uppajjanti. Kusalānaṁ uppādakkhaṇe tesaṁ akusalā ca dhammā uppajjissanti kusalā ca dhammā uppajjanti. Yassa kusalā dhammā uppajjanti tassa abyākatā dhammā uppajjissantīti? Āmantā.