Sabbesaṁ cavantānaṁ pavatte kusalavippayuttacittassa bhaṅgakkhaṇe tesaṁ abyākatā dhammā nirujjhanti, no ca tesaṁ kusalā dhammā nirujjhanti. Pañcavokāre kusalānaṁ bhaṅgakkhaṇe tesaṁ abyākatā ca dhammā nirujjhanti kusalā ca dhammā nirujjhanti. Yassa akusalā dhammā nirujjhanti tassa abyākatā dhammā nirujjhantīti? Arūpe akusalānaṁ bhaṅgakkhaṇe tesaṁ akusalā dhammā nirujjhanti, no ca tesaṁ abyākatā dhammā nirujjhanti. Pañcavokāre akusalānaṁ bhaṅgakkhaṇe tesaṁ akusalā ca dhammā nirujjhanti abyākatā ca dhammā nirujjhanti. Yassa vā pana abyākatā dhammā nirujjhanti tassa akusalā dhammā nirujjhantīti? Sabbesaṁ cavantānaṁ pavatte akusalavippayuttacittassa bhaṅgakkhaṇe tesaṁ abyākatā dhammā nirujjhanti, no ca tesaṁ akusalā dhammā nirujjhanti. Pañcavokāre akusalānaṁ bhaṅgakkhaṇe tesaṁ abyākatā ca dhammā nirujjhanti akusalā ca dhammā nirujjhanti. 9.2.2.1.2. Anulomaokāsa Yattha kusalā dhammā nirujjhanti tattha akusalā dhammā nirujjhantīti? Āmantā. Yattha vā pana akusalā dhammā nirujjhanti tattha kusalā dhammā nirujjhantīti? Āmantā. Yattha kusalā dhammā nirujjhanti tattha abyākatā dhammā nirujjhantīti? Āmantā. Yattha vā pana abyākatā dhammā nirujjhanti tattha kusalā dhammā nirujjhantīti?