Yassa vā pana abyākatā dhammā nirujjhissanti tassa kusalā dhammā uppajjantīti? Sabbesaṁ cittassa bhaṅgakkhaṇe kusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ abyākatā dhammā nirujjhissanti, no ca tesaṁ kusalā dhammā uppajjanti. Kusalānaṁ uppādakkhaṇe tesaṁ abyākatā ca dhammā nirujjhissanti kusalā ca dhammā uppajjanti. Yassa akusalā dhammā uppajjanti tassa abyākatā dhammā nirujjhissantīti? Āmantā. Yassa vā pana abyākatā dhammā nirujjhissanti tassa akusalā dhammā uppajjantīti? Sabbesaṁ cittassa bhaṅgakkhaṇe akusalavippayuttacittassa uppādakkhaṇe nirodhasamāpannānaṁ asaññasattānaṁ tesaṁ abyākatā dhammā nirujjhissanti, no ca tesaṁ akusalā dhammā uppajjanti. Akusalānaṁ uppādakkhaṇe tesaṁ abyākatā ca dhammā nirujjhissanti akusalā ca dhammā uppajjanti. 9.2.3.5.2. Anulomaokāsa Yattha kusalā dhammā uppajjanti tattha akusalā dhammā nirujjhissantīti? …pe…. 9.2.3.5.3. Anulomapuggalokāsa Yassa yattha kusalā dhammā uppajjanti tassa tattha akusalā dhammā nirujjhissantīti? Aggamaggassa uppādakkhaṇe yassa cittassa anantarā aggamaggaṁ paṭilabhissanti tassa cittassa uppādakkhaṇe tesaṁ tattha kusalā dhammā uppajjanti, no ca tesaṁ tattha akusalā dhammā nirujjhissanti. Itaresaṁ kusalānaṁ uppādakkhaṇe tesaṁ tattha kusalā ca dhammā uppajjanti akusalā ca dhammā nirujjhissanti.