Acittakānaṁ upapajjantānaṁ tesaṁ tattha jīvitindriyaṁ uppajjati, no ca tesaṁ tattha manindriyaṁ uppajjati. Sacittakānaṁ upapajjantānaṁ pavatte cittassa uppādakkhaṇe tesaṁ tattha jīvitindriyañca uppajjati manindriyañca uppajjati. Yassa vā pana yattha manindriyaṁ uppajjati tassa tattha jīvitindriyaṁ uppajjatīti? Āmantā. (Jīvitindriyamūlakaṁ.) Yassa yattha somanassindriyaṁ uppajjati tassa tattha upekkhindriyaṁ uppajjatīti? No. Yassa vā pana yattha upekkhindriyaṁ uppajjati tassa tattha somanassindriyaṁ uppajjatīti? No. Yassa yattha somanassindriyaṁ uppajjati tassa tattha saddhindriyaṁ uppajjatīti? Pavatte somanassasampayuttasaddhāvippayuttacittassa uppādakkhaṇe tesaṁ tattha somanassindriyaṁ uppajjati, no ca tesaṁ tattha saddhindriyaṁ uppajjati. Somanassena upapajjantānaṁ pavatte somanassasampayuttasaddhāsampayuttacittassa uppādakkhaṇe tesaṁ tattha somanassindriyañca uppajjati saddhindriyañca uppajjati. Yassa vā pana yattha saddhindriyaṁ uppajjati tassa tattha somanassindriyaṁ uppajjatīti? Sahetukānaṁ vinā somanassena upapajjantānaṁ pavatte saddhāsampayuttasomanassavippayuttacittassa uppādakkhaṇe tesaṁ tattha saddhindriyaṁ uppajjati, no ca tesaṁ tattha somanassindriyaṁ uppajjati. Somanassena upapajjantānaṁ pavatte saddhāsampayuttasomanassasampayuttacittassa uppādakkhaṇe tesaṁ tattha saddhindriyañca uppajjati somanassindriyañca uppajjati.