Yassa cakkhundriyaṁ na uppajjissati tassa upekkhindriyaṁ na uppajjissatīti? Ye arūpaṁ upapajjitvā parinibbāyissanti tesaṁ cakkhundriyaṁ na uppajjissati, no ca tesaṁ upekkhindriyaṁ na uppajjissati. Pacchimabhavikānaṁ tesaṁ cakkhundriyañca na uppajjissati upekkhindriyañca na uppajjissati. Yassa vā pana upekkhindriyaṁ na uppajjissati tassa cakkhundriyaṁ na uppajjissatīti? Ye sacakkhukā somanassena upapajjitvā parinibbāyissanti tesaṁ upekkhindriyaṁ na uppajjissati, no ca tesaṁ cakkhundriyaṁ na uppajjissati. Pacchimabhavikānaṁ tesaṁ upekkhindriyañca na uppajjissati cakkhundriyañca na uppajjissati. Yassa cakkhundriyaṁ na uppajjissati tassa saddhindriyaṁ …pe… paññindriyaṁ …pe… manindriyaṁ na uppajjissatīti? Ye arūpaṁ upapajjitvā parinibbāyissanti tesaṁ cakkhundriyaṁ na uppajjissati, no ca tesaṁ manindriyaṁ na uppajjissati. Pacchimabhavikānaṁ tesaṁ cakkhundriyañca na uppajjissati manindriyañca na uppajjissati. Yassa vā pana manindriyaṁ na uppajjissati tassa cakkhundriyaṁ na uppajjissatīti? Āmantā. (Cakkhundriyamūlakaṁ.) Yassa ghānindriyaṁ na uppajjissati tassa itthindriyaṁ na uppajjissatīti? Āmantā. Yassa vā pana itthindriyaṁ na uppajjissati tassa ghānindriyaṁ na uppajjissatīti?