Pacchimabhavikānaṁ purisānaṁ upapajjantānaṁ ye ca purisā upekkhāya upapajjitvā parinibbāyissanti tesaṁ upapajjantānaṁ tesaṁ somanassindriyaṁ na uppajjissati, no ca tesaṁ purisindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ ye ca upekkhāya upapajjitvā parinibbāyissanti tesaṁ cavantānaṁ tesaṁ somanassindriyañca na uppajjissati purisindriyañca na uppajjati. Yassa purisindriyaṁ na uppajjati tassa upekkhindriyaṁ na uppajjissatīti? Sabbesaṁ cavantānaṁ na purisānaṁ upapajjantānaṁ tesaṁ purisindriyaṁ na uppajjati, no ca tesaṁ upekkhindriyaṁ na uppajjissati. Kāmāvacare parinibbantānaṁ rūpāvacare arūpāvacare pacchimabhavikānaṁ ye ca somanassena upapajjitvā parinibbāyissanti tesaṁ cavantānaṁ tesaṁ purisindriyañca na uppajjati upekkhindriyañca na uppajjissati. Yassa vā pana upekkhindriyaṁ na uppajjissati tassa purisindriyaṁ na uppajjatīti? Pacchimabhavikānaṁ purisānaṁ upapajjantānaṁ ye ca purisā somanassena upapajjitvā parinibbāyissanti tesaṁ upapajjantānaṁ tesaṁ upekkhindriyaṁ na uppajjissati, no ca tesaṁ purisindriyaṁ na uppajjati. Kāmāvacare parinibbantānaṁ rūpāvacare arūpāvacare pacchimabhavikānaṁ ye ca somanassena upapajjitvā parinibbāyissanti tesaṁ cavantānaṁ tesaṁ upekkhindriyañca na uppajjissati purisindriyañca na uppajjati.