Yassa cittaṁ na uppajjittha no ca tassa cittaṁ na uppannaṁ, tassa cittaṁ na uppajjissatīti? Natthi. Yassa vā pana cittaṁ na uppajjissati no ca tassa cittaṁ na uppannaṁ, tassa cittaṁ na uppajjitthāti? Uppajjittha. 8.2.1.1.12. Uppannuppajjamānavāra Uppannaṁ uppajjamānanti? Bhaṅgakkhaṇe uppannaṁ, no ca uppajjamānaṁ. Uppādakkhaṇe uppannañceva uppajjamānañca. Uppajjamānaṁ uppannanti? Āmantā. Na uppannaṁ na uppajjamānanti? Āmantā. Na uppajjamānaṁ na uppannanti? Bhaṅgakkhaṇe na uppajjamānaṁ, no ca na uppannaṁ. Atītānāgataṁ cittaṁ na ceva uppajjamānaṁ na ca uppannaṁ. 8.2.1.1.13. Niruddhanirujjhamānavāra Niruddhaṁ nirujjhamānanti? No. Nirujjhamānaṁ niruddhanti? No. Na niruddhaṁ na nirujjhamānanti? Bhaṅgakkhaṇe na niruddhaṁ, no ca na nirujjhamānaṁ. Uppādakkhaṇe anāgatañca cittaṁ na ceva niruddhaṁ na ca nirujjhamānaṁ. Na nirujjhamānaṁ na niruddhanti? Atītaṁ cittaṁ na nirujjhamānaṁ, no ca na niruddhaṁ. Uppādakkhaṇe anāgatañca cittaṁ na ceva nirujjhamānaṁ na ca niruddhaṁ. 8.2.1.1.14. Atikkantakālavāra Yassa cittaṁ uppajjamānaṁ khaṇaṁ khaṇaṁ vītikkantaṁ atikkantakālaṁ, nirujjhamānaṁ khaṇaṁ khaṇaṁ vītikkantaṁ atikkantakālaṁ tassa cittanti? Bhaṅgakkhaṇe cittaṁ uppādakkhaṇaṁ vītikkantaṁ bhaṅgakkhaṇaṁ avītikkantaṁ, atītaṁ cittaṁ uppādakkhaṇañca vītikkantaṁ bhaṅgakkhaṇañca vītikkantaṁ.