Yassa vā pana abyākatā dhammā nirujjhittha tassa kusalā dhammā nirujjhantīti? Sabbesaṁ cittassa uppādakkhaṇe kusalavippayuttacittassa bhaṅgakkhaṇe nirodhasamāpannānaṁ asaññasattānaṁ tesaṁ abyākatā dhammā nirujjhittha, no ca tesaṁ kusalā dhammā nirujjhanti. Kusalānaṁ bhaṅgakkhaṇe tesaṁ abyākatā ca dhammā nirujjhittha kusalā ca dhammā nirujjhanti. Yassa akusalā dhammā nirujjhanti tassa abyākatā dhammā nirujjhitthāti? Āmantā. Yassa vā pana abyākatā dhammā nirujjhittha tassa akusalā dhammā nirujjhantīti? Sabbesaṁ cittassa uppādakkhaṇe akusalavippayuttacittassa bhaṅgakkhaṇe nirodhasamāpannānaṁ asaññasattānaṁ tesaṁ abyākatā dhammā nirujjhittha, no ca tesaṁ akusalā dhammā nirujjhanti. Akusalānaṁ bhaṅgakkhaṇe tesaṁ abyākatā ca dhammā nirujjhittha akusalā ca dhammā nirujjhanti. 9.2.2.4.2. Anulomaokāsa Yattha kusalā dhammā nirujjhanti tattha akusalā dhammā nirujjhitthāti? …pe…. 9.2.2.4.3. Anulomapuggalokāsa Yassa yattha kusalā dhammā nirujjhanti tassa tattha akusalā dhammā nirujjhitthāti? Āmantā. Yassa vā pana yattha akusalā dhammā nirujjhittha tassa tattha kusalā dhammā nirujjhantīti? Sabbesaṁ cittassa uppādakkhaṇe kusalavippayuttacittassa bhaṅgakkhaṇe tesaṁ tattha akusalā dhammā nirujjhittha, no ca tesaṁ tattha kusalā dhammā nirujjhanti. Kusalānaṁ bhaṅgakkhaṇe tesaṁ tattha akusalā ca dhammā nirujjhittha kusalā ca dhammā nirujjhanti.