Yassa cakkhundriyaṁ uppajjittha tassa upekkhindriyaṁ uppajjissatīti? Pacchimabhavikānaṁ ye ca somanassena upapajjitvā parinibbāyissanti tesaṁ cakkhundriyaṁ uppajjittha, no ca tesaṁ upekkhindriyaṁ uppajjissati. Itaresaṁ tesaṁ cakkhundriyañca uppajjittha upekkhindriyañca uppajjissati. Yassa vā pana upekkhindriyaṁ uppajjissati tassa cakkhundriyaṁ uppajjitthāti? Āmantā. Yassa cakkhundriyaṁ uppajjittha tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimabhavikānaṁ tesaṁ cakkhundriyaṁ uppajjittha, no ca tesaṁ manindriyaṁ uppajjissati. Itaresaṁ tesaṁ cakkhundriyañca uppajjittha manindriyañca uppajjissati. Yassa vā pana manindriyaṁ uppajjissati tassa cakkhundriyaṁ uppajjitthāti? Āmantā. (Cakkhundriyamūlakaṁ.) Yassa ghānindriyaṁ uppajjittha tassa itthindriyaṁ uppajjissatīti? Pacchimabhavikānaṁ ye ca rūpāvacaraṁ arūpāvacaraṁ upapajjitvā parinibbāyissanti ye ca purisā eteneva bhāvena katici bhave dassetvā parinibbāyissanti tesaṁ ghānindriyaṁ uppajjittha, no ca tesaṁ itthindriyaṁ uppajjissati. Itaresaṁ tesaṁ ghānindriyañca uppajjittha itthindriyañca uppajjissati. Yassa vā pana itthindriyaṁ uppajjissati tassa ghānindriyaṁ uppajjitthāti? Āmantā.