Yassa vā pana somanassindriyaṁ uppajjissati tassa cakkhundriyaṁ uppajjatīti? Sabbesaṁ cavantānaṁ acakkhukānaṁ upapajjantānaṁ tesaṁ somanassindriyaṁ uppajjissati, no ca tesaṁ cakkhundriyaṁ uppajjati. Sacakkhukānaṁ upapajjantānaṁ tesaṁ somanassindriyañca uppajjissati cakkhundriyañca uppajjati. Yassa cakkhundriyaṁ uppajjati tassa upekkhindriyaṁ uppajjissatīti? Pacchimabhavikānaṁ pañcavokāraṁ upapajjantānaṁ ye ca sacakkhukā somanassena upapajjitvā parinibbāyissanti tesaṁ upapajjantānaṁ tesaṁ cakkhundriyaṁ uppajjati, no ca tesaṁ upekkhindriyaṁ uppajjissati. Itaresaṁ sacakkhukānaṁ upapajjantānaṁ tesaṁ cakkhundriyañca uppajjati upekkhindriyañca uppajjissati. Yassa vā pana upekkhindriyaṁ uppajjissati tassa cakkhundriyaṁ uppajjatīti? Sabbesaṁ cavantānaṁ acakkhukānaṁ upapajjantānaṁ tesaṁ upekkhindriyaṁ uppajjissati, no ca tesaṁ cakkhundriyaṁ uppajjati. Sacakkhukānaṁ upapajjantānaṁ tesaṁ upekkhindriyañca uppajjissati cakkhundriyañca uppajjati. Yassa cakkhundriyaṁ uppajjati tassa saddhindriyaṁ …pe… paññindriyaṁ …pe… manindriyaṁ uppajjissatīti? Pacchimabhavikānaṁ pañcavokāraṁ upapajjantānaṁ tesaṁ cakkhundriyaṁ uppajjati, no ca tesaṁ manindriyaṁ uppajjissati. Itaresaṁ sacakkhukānaṁ upapajjantānaṁ tesaṁ cakkhundriyañca uppajjati manindriyañca uppajjissati. Yassa vā pana manindriyaṁ uppajjissati tassa cakkhundriyaṁ uppajjatīti?