Ahetukānaṁ sacittakānaṁ upapajjantānaṁ pavatte saddhāvippayuttacittassa uppādakkhaṇe tesaṁ saddhindriyaṁ na uppajjati, no ca tesaṁ manindriyaṁ na uppajjati. Sabbesaṁ cittassa bhaṅgakkhaṇe nirodhasamāpannānaṁ asaññasattānaṁ tesaṁ saddhindriyañca na uppajjati manindriyañca na uppajjati. Yassa vā pana manindriyaṁ na uppajjati tassa saddhindriyaṁ na uppajjatīti? Āmantā. (Saddhindriyamūlakaṁ.) Yassa paññindriyaṁ na uppajjati tassa manindriyaṁ na uppajjatīti? Ñāṇavippayuttānaṁ sacittakānaṁ upapajjantānaṁ pavatte ñāṇavippayuttacittassa uppādakkhaṇe tesaṁ paññindriyaṁ na uppajjati, no ca tesaṁ manindriyaṁ na uppajjati. Sabbesaṁ cittassa bhaṅgakkhaṇe nirodhasamāpannānaṁ asaññasattānaṁ tesaṁ paññindriyañca na uppajjati manindriyañca na uppajjati. Yassa vā pana manindriyaṁ na uppajjati tassa paññindriyaṁ na uppajjatīti? Āmantā. (Paññindriyamūlakaṁ.) 10.2.1.1.5. Paccanīkaokāsa Yattha cakkhundriyaṁ na uppajjati tattha sotindriyaṁ na uppajjatīti? Āmantā. Yattha vā pana sotindriyaṁ na uppajjati tattha cakkhundriyaṁ na uppajjatīti? Āmantā. Yattha cakkhundriyaṁ na uppajjati tattha ghānindriyaṁ na uppajjatīti? Āmantā. Yattha vā pana ghānindriyaṁ na uppajjati tattha cakkhundriyaṁ na uppajjatīti? Rūpāvacare tattha ghānindriyaṁ na uppajjati, no ca tattha cakkhundriyaṁ na uppajjati. Asaññasatte arūpe tattha ghānindriyañca na uppajjati cakkhundriyañca na uppajjati. Yattha cakkhundriyaṁ na uppajjati tattha itthindriyaṁ …pe… purisindriyaṁ na uppajjatīti? Āmantā. Yattha vā pana purisindriyaṁ na uppajjati tattha cakkhundriyaṁ na uppajjatīti?