Yassa somanassindriyaṁ na uppajjati tassa saddhindriyaṁ na uppajjatīti? Vinā somanassena sahetukānaṁ upapajjantānaṁ pavatte somanassavippayuttasaddhāsampayuttacittassa uppādakkhaṇe tesaṁ somanassindriyaṁ na uppajjati, no ca tesaṁ saddhindriyaṁ na uppajjati. Sabbesaṁ cittassa bhaṅgakkhaṇe somanassavippayuttasaddhāvippayuttacittassa uppādakkhaṇe nirodhasamāpannānaṁ asaññasattānaṁ tesaṁ somanassindriyañca na uppajjati saddhindriyañca na uppajjati. Yassa vā pana saddhindriyaṁ na uppajjati tassa somanassindriyaṁ na uppajjatīti? Pavatte saddhāvippayuttasomanassasampayuttacittassa uppādakkhaṇe tesaṁ saddhindriyaṁ na uppajjati, no ca tesaṁ somanassindriyaṁ na uppajjati. Sabbesaṁ cittassa bhaṅgakkhaṇe saddhāvippayuttasomanassavippayuttacittassa uppādakkhaṇe nirodhasamāpannānaṁ asaññasattānaṁ tesaṁ saddhindriyañca na uppajjati somanassindriyañca na uppajjati. Yassa somanassindriyaṁ na uppajjati tassa paññindriyaṁ na uppajjatīti? Vinā somanassena ñāṇasampayuttānaṁ upapajjantānaṁ pavatte somanassavippayuttañāṇasampayuttacittassa uppādakkhaṇe tesaṁ somanassindriyaṁ na uppajjati, no ca tesaṁ paññindriyaṁ na uppajjati. Sabbesaṁ cittassa bhaṅgakkhaṇe somanassavippayuttañāṇavippayuttacittassa uppādakkhaṇe nirodhasamāpannānaṁ asaññasattānaṁ tesaṁ somanassindriyañca na uppajjati paññindriyañca na uppajjati. Yassa vā pana paññindriyaṁ na uppajjati tassa somanassindriyaṁ na uppajjatīti?