Yassa yattha cakkhundriyaṁ uppajjittha tassa tattha purisindriyaṁ uppajjissatīti? Kāmāvacare pacchimabhavikānaṁ rūpāvacarānaṁ yā ca itthiyo eteneva bhāvena katici bhave dassetvā parinibbāyissanti tesaṁ tattha cakkhundriyaṁ uppajjittha, no ca tesaṁ tattha purisindriyaṁ uppajjissati. Itaresaṁ kāmāvacarānaṁ tesaṁ tattha cakkhundriyañca uppajjittha purisindriyañca uppajjissati. Yassa vā pana yattha purisindriyaṁ uppajjissati tassa tattha cakkhundriyaṁ uppajjitthāti? Āmantā. Yassa yattha cakkhundriyaṁ uppajjittha tassa tattha jīvitindriyaṁ uppajjissatīti? Pañcavokāre pacchimabhavikānaṁ tesaṁ tattha cakkhundriyaṁ uppajjittha, no ca tesaṁ tattha jīvitindriyaṁ uppajjissati. Itaresaṁ pañcavokārānaṁ tesaṁ tattha cakkhundriyañca uppajjittha jīvitindriyañca uppajjissati. Yassa vā pana yattha jīvitindriyaṁ uppajjissati tassa tattha cakkhundriyaṁ uppajjitthāti? Asaññasattānaṁ arūpānaṁ tesaṁ tattha jīvitindriyaṁ uppajjissati, no ca tesaṁ tattha cakkhundriyaṁ uppajjittha. Pañcavokārānaṁ tesaṁ tattha jīvitindriyañca uppajjissati cakkhundriyañca uppajjittha. Yassa yattha cakkhundriyaṁ uppajjittha tassa tattha somanassindriyaṁ uppajjissatīti?