Yassa yattha saddhindriyaṁ uppajjati tassa tattha paññindriyaṁ uppajjatīti? Sahetukānaṁ ñāṇavippayuttānaṁ upapajjantānaṁ pavatte saddhāsampayuttañāṇavippayuttacittassa uppādakkhaṇe tesaṁ tattha saddhindriyaṁ uppajjati, no ca tesaṁ tattha paññindriyaṁ uppajjati. Sahetukānaṁ ñāṇasampayuttānaṁ upapajjantānaṁ pavatte saddhāsampayuttañāṇasampayuttacittassa uppādakkhaṇe tesaṁ tattha saddhindriyañca uppajjati paññindriyañca uppajjati. Yassa vā pana yattha paññindriyaṁ uppajjati tassa tattha saddhindriyaṁ uppajjatīti? Āmantā. Yassa yattha saddhindriyaṁ uppajjati tassa tattha manindriyaṁ uppajjatīti? Āmantā. Yassa vā pana yattha manindriyaṁ uppajjati tassa tattha saddhindriyaṁ uppajjatīti? Sacittakānaṁ ahetukānaṁ upapajjantānaṁ pavatte saddhāvippayuttacittassa uppādakkhaṇe tesaṁ tattha manindriyaṁ uppajjati, no ca tesaṁ tattha saddhindriyaṁ uppajjati. Sahetukānaṁ upapajjantānaṁ pavatte saddhāsampayuttacittassa uppādakkhaṇe tesaṁ tattha manindriyañca uppajjati saddhindriyañca uppajjati. (Saddhindriyamūlakaṁ.) Yassa yattha paññindriyaṁ uppajjati tassa tattha manindriyaṁ uppajjatīti? Āmantā. Yassa vā pana yattha manindriyaṁ uppajjati tassa tattha paññindriyaṁ uppajjatīti?