Sacittakānaṁ ñāṇavippayuttānaṁ upapajjantānaṁ pavatte ñāṇavippayuttacittassa uppādakkhaṇe tesaṁ tattha manindriyaṁ uppajjati, no ca tesaṁ tattha paññindriyaṁ uppajjati. Ñāṇasampayuttānaṁ upapajjantānaṁ pavatte ñāṇasampayuttacittassa uppādakkhaṇe tesaṁ tattha manindriyañca uppajjati paññindriyañca uppajjati. (Paññindriyamūlakaṁ.) 10.2.1.1.4. Paccanīkapuggala Yassa cakkhundriyaṁ na uppajjati tassa sotindriyaṁ na uppajjatīti? Acakkhukānaṁ sasotakānaṁ upapajjantānaṁ tesaṁ cakkhundriyaṁ na uppajjati, no ca tesaṁ sotindriyaṁ na uppajjati. Sabbesaṁ cavantānaṁ acakkhukānaṁ asotakānaṁ upapajjantānaṁ tesaṁ cakkhundriyañca na uppajjati sotindriyañca na uppajjati. Yassa vā pana sotindriyaṁ na uppajjati tassa cakkhundriyaṁ na uppajjatīti? Asotakānaṁ sacakkhukānaṁ upapajjantānaṁ tesaṁ sotindriyaṁ na uppajjati, no ca tesaṁ cakkhundriyaṁ na uppajjati. Sabbesaṁ cavantānaṁ asotakānaṁ acakkhukānaṁ upapajjantānaṁ tesaṁ sotindriyañca na uppajjati cakkhundriyañca na uppajjati. Yassa cakkhundriyaṁ na uppajjati tassa ghānindriyaṁ na uppajjatīti? Acakkhukānaṁ saghānakānaṁ upapajjantānaṁ tesaṁ cakkhundriyaṁ na uppajjati, no ca tesaṁ ghānindriyaṁ na uppajjati. Sabbesaṁ cavantānaṁ acakkhukānaṁ aghānakānaṁ upapajjantānaṁ tesaṁ cakkhundriyañca na uppajjati ghānindriyañca na uppajjati. Yassa vā pana ghānindriyaṁ na uppajjati tassa cakkhundriyaṁ na uppajjatīti?